Wednesday, October 21, 2009

Hérna í Cork er allt við það sama ég jóga og vinn og les í sjónvarpsleysinu. Hef ekkert farið út að hlaupa en það á vonandi eftir að breytast til batnaðar. Ég fór í sun salutation workshop á sunnudaginn, jóga í 2 1/2 tíma og ég er enn með magnaðar harðsperrur.
Það er búið að rigna nokkuð mikið seinustu tvo daga en sem betur fer ekki á morgnana þegar ég er að labba í vinnuna svo ég er meira en sátt.
Ég fór aðeins út á lífið með vinnufélögunum á föstudaginn en var ekki lengi, aðallega vegna blankheita, Ísland og Írland eiga það nefnilega sameiginlegt að það er barasta allt frekar dýrt á báðum stöðum.
Ég hamast áfram við að greina bein og skrifa skýrslur í vinnunni. Ég er aljgörlega búin að tapa tölunni á skýrslunum sem ég er búin að skrifa hérna.
Næsta helgi er löng, frí á mánudaginn. Ég er að hugsa um að gera mér ferð í dýragarðinn sem er hér í næsta bæ ef veðrið verður gott.
Ég er búin að kaupa flugmiða heim frá London 20. desember, ætla að reyna að fara til London 19. desember til að geta skoðað mig aðeins um þar, helst kíkja í Tate safnið og sjúga í mig smá menningu.

Thursday, September 24, 2009

Það er enn yndislegt veður hérna í Cork, sól, logn og hlýtt. Það er líka allt ótrúlega grænt og fallegt ennþá, það er óhemju mikill gróður hér svo hvergi sér í auðan blett þar sem er ekki hreinlega þverhnípt klöpp eða steypa.
Ég er búin að vinna mikið þessa vikuna og mæta tvisvar í jóga. Núna er ég að greina lítið dýrabeinasafn frá uppgreftri á ring-ditch (ég kann ekki neina þýðingu á þessu orði) sem er líklega frá brons- eða járnöld. Í þessu litla safni sem er tengt brenndum mannabeinum var nánast heill hundur, kjálki af kú og kjálki af hesti. Þetta er mögulega einhverskonar fórn eða gjöf, spennó...

Tuesday, September 22, 2009

Vegna áskorunnar frá Hildi ætla ég loksins að blogga. Ég fór til Dublin um helgina á fund hjá vinnuhóp um fiskigildrur og rannsóknir á þeim. Ég vissi ekkert um fiskigildrur þegar ég fór en veit núna margt um þær, ég fer ekki út í það hér. Veðrið hér er búið að vera ótrúlega gott alveg síðan annan daginn minn í vinnunni þegar ég kom þangað rennandi blaut eftir að hafa labbað í hálftíma í hellirigningu, það var ekki mjög gaman en þó ekki svo slæmt því það er enn yfir 15°C hiti hér flesta daga.
Mér líkar rosalega vel í vinnunni í dag kláraði ég að greina þokkalega stórt beinasafn, í því var eitt jarðlag með fjórum brotnum nautgripahauskúpum, það var ansi skemmtilegt þrívíddar púsluspil.
Annars er það helst í fréttum að H&M er að opna hérna í Cork eftir allt saman, 1. október, svona eins og afmælisgjöf handa mér, ég er mjög spennt. Ég fékk líka loksins írsku kennitöluna mína í dag. Það eru mjög góðar fréttir því það þýðir að ég dett niður í að borga bara 20% skatt og fæ endurgreiddan oftekinn skatt. Skattkerfið hér er víst mjög skilvirkt (einn af ekki svo mörgum hlutum í stjórnkerfinu er mér sagt).
Umferðin hér er hins vegar fullkomlega brjálæðisleg, fólk keyrir mjög hratt, fer lítið eftir lögum og reglum og það er nauðsynlegt að vera sífellt á varðbergi. Ég er að verða búin að fatta að líta fyrst til vinstri og svo til hægri en ekki öfugt og hef ekki enn náð að fara mér að voða.

Monday, September 07, 2009

Þá er ég búin að mæta einn dag í vinnuna. Það gekk vel en ég byrja svo fyrir alvöru á morgun. Ég er spennt að byrja að skoða beinin, þó að þetta sé mest kýr og kindur svipað og heima þá eru líka dádýr, hérar, kanínur og margt fleira skemmtilegt og nýtt. Kindabeinin hér eru líka mjög ólík þeim íslensku, miklu minni og fíngerðari, ég á eiginlega erfitt með að trúa því.
Flestir uppgreftirnir sem ég er að greina úr eru frekar litlir svo það verður ekki mikið hægt að segja um þá en ég verð amk með einn stóran uppgröft úr yfirgefnu miðaldaþorpi og það finnst mér æðislega spennandi.
Ég ætla að mæta kl. 8 á morgun, sem þýðir að ég þarf að vakna um 6.30, taka lestina kl. 7.15 og labba svo í 30 mínútur. Ég vona að það rigni aldrei á meðan ég er hérna, amk ekki fyrren ég er búin að kaupa mér betri jakka...
Eftir vinnu fór ég svo í jóga sem var mjög fínt, gott að slaka á og teygja eftir stress og flutninga.
Til að svara spurningu sem kom fram þá er innan við 5 mínútna gangur á svona 6 mismunandi bari og 3 mínútur í verðlaunaða off-licence svo það er mjög auðvelt að verða sér út um áfengi hér.

Sunday, September 06, 2009

Flutningarnir miklu
Á föstudaginn var langur langur dagur. Fyrst ætla ég samt að tala um fimmtudaginn, ég gat ekki bloggað þar sem internetið í götunni þar sem farfuglaheimilið var bilaði. Ég hélt ég myndi deyja úr netskorti en svo fór ekki.
Á fimmtudaginn tókst mér að fá símanúmer og koma af stað umsókn um bankareikning. Ég fjárfesti líka í risastóru fjólubláu handklæði og gulllituðum íþróttaskóm sem ég réttlætti með því að ég þarf að labba í 20 mínútur frá lestinni í vinnuna og til þess þarf maður jú skó. Ég fór svo í stutta heimsókn á vinnustaðinn minn, það leit allt mjög vel út, ég deili skrifstofu með hinum dýrabeinafornleifafræðingnum, hinni finnsku Dr. Auli (hún heitir þetta). Skrifstofan okkar er sú besta í húsinu með góðum gluggum og ágætlega rúmgóð.
Eftir þetta fór ég svo að skoða fyrstu íbúðina mína í Cork. Það var ekki skemmtilegt. Hún var tveggja herbergja og á ágætum stað en húsið var mjög gamalt og sameignin skítug. Það lá fúkkalykt yfir öllu og þrátt fyrir að verið væri að vinna í að taka íbúðina sem mér bauðst til leigu í gegn er vandséð hvernig smá yfirhalning hefði getað komið þessum hjalli í íbúðarhæft stand. Ég fylltist smá örvæntingu við þetta enda var ég bara búin að mæla mér mót að skoða eina íbúð enn. Ég kom við á öllum leigusölum sem ég labbaði framhjá, og þær eru mjög margar í Cork en bara á einum stað voru þeir með íbúð sem þau voru tilbúin að leigja í svona stuttan tíma. Hún var reyndar dýrari en ég hafði áætlað en ég tilbúin að borga nánast hvað sem er bara til að þurfa ekki að búa í húsi með fúkkalykt og almennri ógleði.
Nú næsta íbúð var í skemmtilegu hverfi, rétt hjá kirkju og á tveimur hæðum en miðað við verðið þá var hún ekki í mjög góðu ástandi, dýnan gömul og ekki pláss fyrir borð af neinu tagi. Ekki gott.
Þriðja og seinasta íbúðin var líka á góðum stað nálægt lestarstöðinni við nokkuð stóra götu en uppi á terrace svo það er ekki hávaði frá umferðinni. Fyrst sýndi leigusalinn mér litla stúdíó íbúð nýupperða og fína en hann var líka með 1 herbergis íbúð við hliðina. Ég skellti mér á hana enda nýuppgert bað, allt hreint og snyrtilegt og vellyktandi, borð og sófi og stórir gluggar til suðurs. Myndir koma seinna.
Í gær lá ég bara í leti til að jafna mig eftir hamaganginn við flutningana, ég var alveg búin á því eftir að hafa borið heila búslóð úr hinum ýmsu búðum neðan úr bæ og heim.

Wednesday, September 02, 2009

Eftir ferðalag sem hófst á Laugavegi um kl. 4.30 í morgun er ég komin á farfuglaheimilið í Cork. Það er víst búið að rigna eins og hellt væri úr fötu hér í marga daga og allir eru óttalega blautir og hraktir eitthvað. Það var samt sól og gott veður þegar ég kom. Ég flaug með Iceland Express sem var ekki hræðilegt heldur bara fínt og eyddi svo dagsparti á flugvellinum í Gatwick. Það var þokkalegt. Ég var gífurlega fegin þegar ég var búin að innrita mig hjá Ryanair, ég var ekki með yfirvigt. Fyrir þá sem þekkja mig verður það að teljast kraftaverk að ég sé að flytja í 4 mánuði með samtals 25 kg.
Ég er pínu stressuð yfir að finna íbúð hérna, það er ekki verið að auglýsa margt og enginn vill leigja mér í 4 mánuði en þetta reddast er það ekki?
Á morgun verður svo íbúðaleit, bankaferð, kennitöluferð, símanúmersferð, ég spái að það eina af þessu sem ég muni geta klárað er að fá símanúmer en vonandi er það óþarfa svartsýni.

Tuesday, April 14, 2009

Ég skellti mér í magnaða ferð með Ungum jafnaðarmönnum á Aldrei fór ég suður og hef ekki skemmt mér svona vel lengi.
Ég var ótrúlega sátt við að sjá loksins Mammút spila en diskurinn þeirra hefur verið í spilaranum á bílunum mínum síðan í desember og er í algjöru uppáhaldi hjá mér.
Mugison var stórkostlegur að venju, gaman að sjá hann spila með hljómsveit því þegar ég sá hann seinast voru þeir bara tveir að spila á Mercury Lounge í New York sem voru reyndar magnaðir tónleikar.
Það var ótrúlega gaman að sjá Diktu spila fyrir framan svona mikið af fólki og ég er ekki frá því að hver einasti maður hafi kunnað hverja einustu línu í hverju einasta lagi, ég heyrði þá spila nokkur ný lög á miðvikudaginn á Dillon Sportbar í Hafnarfirði og er spennt að fá að heyra nýja plötu.
Agent Fresco tóku sín lög með snilld og ég uppgötvaði nýja sveit, Vicky, ég keypti diskinn þeirra á N1 á Ísafirði og er spennt að fara að hlusta.
Bix kom líka skemmtilega á óvart.
Annars var bara svo ótrúlega góð og skemmtileg stemmning á hátíðinni almennt og gestrini og hjálpsemi Ísfirðinga og nærsveitunga var ótrúleg.
Við fórum í sund á Suðureyri á laugardagsmorgninum, sundlaugin var opnuð fyrr og umsjónarmaðurinn bauð okkur upp á kaffi.
Aksturinn báðar leiðir var nokkuð ævintýralegur, sprungin dekk, bensínleysi, ónýt púst, útafakstur, ævintýraleg hálka og fleira en allt saman var þetta ógleymanlegt.
Á leiðinni til baka stoppuðum við á Reykjanesi, fengum okkur að borða og ég keypti æðislega ullarpeysu.

Út í aðra og leiðinlegri sálma þá verð ég að segja að Sjálfstæðisflokkurinn er alls ekki að ná að grafa sig upp úr holunni sinni og ég verð að segja að ég varð bara reið þegar Bjarni Benidiktsson sagði í fréttunum að það væri allt komið upp á borðið og flokkurinn væri búinn að gera allt sem hægt væri að gera og allt væri komið í ljós varðandi styrkjamálið. Ég er hjartanlega ósammála þessu, þeir eru búnir að ljúga og ljúga og í raun ekki búnir að láta neinn sem máli skiptir taka ábyrgð, ég hef enga trú á að Geir einn beri ábyrgð, að Kjartan hafi ekki vitað um þetta og að fólk sem er í framvarðasveit flokksins komi ekkert nálægt fjármögnun, það sér bara hver heilvita maður að þetta er ekki satt.